ភ្នំពេញ ៖ បុរសម្នាក់សង្ស័យស្រវឹង ជិះម៉ូតូទៅបុកទ្រូងផ្លូវបណ្ដាលឱ្យបោកក្បាលស្លាប់ភ្លាមៗនៅនឹងកន្លែងកើតហេតុកាលពីវេលាម៉ោង ១២រំលងអធ្រាត្រឈានចូលថ្ងៃទី១៨ ខែកុម្ភៈ ឆ្នាំ២០២៣ ស្ថិតនៅតាមបណ្ដោយផ្លូវក្រវាត់ក្រុងខាងក្រោយវត្តជន្លង់ម្លូ ក្នុងសង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
សមត្ថកិច្ចនិយាយថា សពជនរងគ្រោះឈ្មោះផុ សុង ភេទប្រុស អាយុ៣៦ឆ្នាំ មានស្រុកកំណើតនៅឃុំពោធិ៍រៀងស្រុកពោធិ៍រៀង ខេត្តព្រៃវែង មុខរបរតៃកុងរថយន្ត បើកបរម៉ូតូម៉ាកគុបជ្រុង ពណ៌ប្រផេះ គ្មានស្លាកលេខ ។
សមត្ថកិច្ចបន្តថា ដំបូងបុរសឈ្មោះផុ សុង បានបើកម៉ូតូយ៉ាងលឿន ក៏ជ្រុលបុកទ្រូងផ្លូវដួលបោកលើថ្នល់ បណ្តាលឱ្យស្លាប់ភ្លាមៗ តែម្តង ។ សពបានប្រគល់ជូនក្រុមគ្រួសារធ្វើបុណ្យតាមប្រពៃណី ។ ចំណែកម៉ូតូរក្សាទុកនៅខណ្ឌ ៕(ដោយធ្នូជ័យ)
