ព្រះសីហនុ ៖ មានគ្រោះថ្នាក់ចរាចរណ៍ រវាងរថយន្ត១គ្រឿង បុកម៉ូតូកង់បី ហើយជ្រុលបុករថយន្ត១គ្រឿងទៀតបណ្តាលឱ្យបុរសម្នាក់បើកម៉ូតូកង់៣រងរបួស កើតឡើងនាវេលាម៉ោង២កន្លះ យប់រំលងអាធ្រាត្រ ថ្ងៃទី១១ ខែកុម្ភៈឆ្នាំ២០២៣ លើផ្លូវ៧មករា ត្រង់ចំណុចជិតស្តុបជាងលីម ភូមិ៣ សង្កាត់៤ ក្រុងព្រះសីហនុ ។
សមត្ថកិច្ចនិយាយថា ភាគីរថយន្ត០១គ្រឿង ម៉ាក CAMARY ពណ៌ស ពាក់ស្លាកលេខ ភ្នំពេញ2AF-0526 បើកបរដោយឈ្មោះ គោ យូឡាយ ភេទប្រុស អាយុ២៦ឆ្នាំ ជនជាតិខ្មែរ បច្ចុប្បន្នស្នាក់នៅ ភូមិ២ សង្កាត់២ ក្រុង-ខេត្តព្រះសីហនុ មានទិសដៅពីកើតទៅលិច ។
លុះដល់ចំណុចខាងលើ ក៏បានបុកប៉ះម៉ូតូកង់បី ០១គ្រឿង គ្មានស្លាកលេខ បើកបរដោយឈ្មោះ លឹម ផល្លា ភេទប្រុសអាយុ៣៦ឆ្នាំ មុខរបររត់កង់បី បច្ចុប្បន្នស្នាក់នៅ ភូមិ២ សង្កាត់៤ ក្រុងព្រះសីហនុ ។ បន្ទាប់មករថយន្តCAMARYនេះ ក៏ជ្រុលទៅបុករថយន្ត០១គ្រឿងទៀត ម៉ាក CAMARYដូចគ្នា ពណ៌ស ពាក់ស្លាកលេខភ្នំពេញ 2V-6006 បើកបរដោយឈ្មោះ មាស សុធារ៉ា ភេទប្រុស អាយុ៣២ឆ្នាំ ជនជាតិខ្មែរ បច្ចុប្បន្នស្នាក់នៅ ភូមិ៣ សង្កាត់៤ ក្រុងព្រះសីហនុបើកបរទិសដៅផ្ទុយគ្នា ។
សមត្ថកិច្ចបន្តទៀតថា ករណីគ្រោះថ្នាក់ចរាចរណ៍ខាងលើនេះ បណ្តាលឱ្យអ្នកបើកបរម៉ូតូកង់បី រងរបួសធ្ងន់។ ក្រោយកើតហេតុ អ្នកបើកបររថយន្តទី១ សមត្ថកិច្ចឃាត់ខ្លួន នាំមកដោះស្រាយបន្តតាមនីតិវិធី ។ចំណែកយានន្តទាំង៣គ្រឿងជាវត្ថុតាង សមត្ថកិច្ច ក៏បានយកមករក្សាទុកនៅការិយាល័យចរាចរណ៍ផ្លូវគោកខេត្តព្រះសីហនុតាមនីតិវិធី៕(ដោយសំណាង៩៦)
