ភ្នំពេញ ៖ អភិបាលរងរាជធានីភ្នំពេញ ឯកឧត្ដម ឃ្លាំង ហួត នៅរសៀល ថ្ងៃទី០៣ ខែកុម្ភៈ ឆ្នាំ២០២៣ បានដឹកនាំក្រុមការងារចុះត្រួតពិនិត្យសំណង់ខុនដូ របស់ឈ្មោះ មុត ភិរម្យ ដែលបានកើតមានឧបទ្ទវហេតុ ធ្លាក់កំណាត់ឈើ ត្រូវប្រជាពលរដ្ឋម្នាក់ស្លាប់ស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ឯកឧត្ដមក៏បានបញ្ជាក់ពីករណី ប្រជាពលរដ្ឋម្នាក់បានស្លាប់ កាលពីកន្លងមកនោះ ឥឡូវបណ្ដឹងបានឈានដល់នីតិវិធីរបស់តុលាការហើយ ។ ដូចនេះការសម្រេចយ៉ាងណា ស្ថិតលើតុលាការ ឯម្ចាស់អគារត្រូវជម្រុញឱ្យ ក្រុមហ៊ុនម៉ៅការសាងសង់ ទទួលខុសត្រូវលើបញ្ហានេះ ។
ក្រោយការត្រួតពិនិត្យ ក្រុមការងារបានពិនិត្យឃើញថា សំណង់ខាងលើនេះ គឺបានសាងសង់លើសច្បាប់អនុញ្ញាត ចំនួន៣ជាន់ ។ឯកឧត្ដម បានណែនាំដូចតទៅ ៖ ទី១ តម្រូវឲ្យម្ចាស់អាគារខាងលេី ផ្អាកសកម្មភាពសាងសង់ទាំងស្រុង ។ ទី២ ត្រូវធ្វេីការដោះស្រាយជាមួយនឹង មន្ទីររៀបចំដែនដី នគរូបនីយកម្ម និងសំណង់ រាជធានីភ្នំពេញ និង ទីចាត់ការរៀបចំក្រុង ដើម្បីពិនិត្យមើលច្បាប់ និងបច្ចេកទេសគុណភាពសំណង់ ថាអគាររបស់ខ្លួន អាចសាងសង់បន្តទៀត ឬក៏ត្រូវរុះរើសំណង់ ដែលបានសង់លើសចេញ ។
ទន្ទឹមនឹងនេះ ឯកឧត្ដមក៏សូមអំពាវនាវ ដល់ម្ចាស់សំណង់ទាំងអស់ ជាពិសេសម្ចាស់សំណង់បុរី មេត្តាអនុវត្តដូចតទៅ៖ ១. ត្រូវមានលិខិតអនុញ្ញាតសាងសង់ ឱ្យបានត្រឹមត្រូវ។ ២. មិនត្រូវសាងសង់ខុសលិខិតអនុញ្ញាត។ ៣. ត្រូវសហការជាមួយក្រុមហ៊ុនសាងសង់ដែលមានអាជ្ញាប័ណ្ណ ពីក្រសួងដែនដី នគរូបនីយកម្ម និងសំណង់។ ៤. ត្រូវអនុវត្តតាមគោលការ សុវត្តិភាព។ ៥. ត្រូវយកចិត្តទុកដាក់ចំពោះ គុណភាពសំណង់របស់ខ្លួន ប្រកបដោយស្មារតីទទួលខុសត្រូវខ្ពស់។ ក្នុងករណីម្ចាស់ការដ្ឋានណាដែលដឹងថាខ្លួន បានសង់ខុសលិខិតអនុញ្ញាត ត្រូវចូលខ្លួនមកដោះស្រាយ ចៀសវាងប្រព្រឹត្តកំហុសធំណាមួយ រហូតដល់មានទោសដល់ខ្លួន ៕ ដោយ ៖ គាសំណាង
