ព្រះសីហនុ ៖ ជនសង្ស័យ៣នាក់ ត្រូវបានកម្លាំងនគរបាលក្រុងព្រះសីហនុ ឃាត់ខ្លួនពាក់ព័ន្ធករណីចោរកម្មលួចម៉ូតូស្ថិតនៅក្រុមទី១៤ ភូមិ៣ សង្កាត់លេខ១ក្រុង–ខេត្តព្រះសីហនុ នាថ្ងៃព្រហស្បតិ៍ ទី២ ខែកុម្ភៈ ឆ្នាំ២០២៣ ។
សមត្ថកិច្ចនិយាយថា ជនសង្ស័យទាំង៣នាក់រួមមាន ១-ឈ្មោះ អ៊ុយ ផានិត ភេទប្រុស មុខរបរ និងស្នាក់នៅមិនពិតប្រាកដ ជាអ្នកបើកម៉ូតូក្រោយពីលួចបានយកទៅផ្លុងចោលនៅក្បែរស្ពានកោះពស់ សង្កាត់៣ និងជាមុខសញ្ញាធ្លាប់ជាប់ពន្ធនាគារ២លើក លើកទី១ក្នុងឆ្នាំ២០១៧ រយៈពេល២ឆ្នាំ០៦ខែ ពីបទជួញដូរនូវសារធាតុញៀនដោយខុសច្បាប់និងលើកទី២ក្នុងឆ្នាំ២០២១ រយ:ពេល០១ឆ្នាំពីបទលួចម៉ូតូ (មិនរាងចាល)។
ជនសង្ស័យទី២-ឈ្មោះ ឃួន លីហួរ ភេទប្រុស អាយុ១៨ឆ្នាំ មុខរបរមិនពិតប្រាកដ បច្ចុប្បន្នរស់នៅម្តុំរ៉ាក្រុមទី១៣ភូមិ៣សង្កាត់លេខ៣ ក្រុង-ខេត្តព្រះសីហនុ ចូលរួមលួច និង ជាមុខសញ្ញាធ្លាប់ ជាប់ពន្ធនាគារ១លើកក្នុងឆ្នាំ២០២២រយៈពេល០៦ខែពីបទប្រើប្រាស់អាវុធដោយខុសច្បាប់ និង
ជនសង្ស័យទី៣-ឈ្មោះ ផល្លា វិច្ឆិកា ហៅវុិច ភេទប្រុស អាយុ១៧ឆ្នាំ មុខរបរមិនពិតប្រាកដ បច្ចុប្បន្នរស់នៅក្រុមទី១៥ភូមិ៣ទំនប់រលក សង្កាត់លេខ១ ក្រុង-ខេត្តព្រះសីហនុ ជនដៃដល់លួចម៉ូតូ ។ វត្ថុតាងចាប់យកបានរួមមានម៉ូតូSCOPY (ផលនៃអំពើលួច) ដាវ០២ដើម និងកាំបិតផ្គាក់០១ដើម ។
បច្ចុប្បន្នជនសង្ស័យកម្លាំងនគរបាលជំនាញបានធ្វើការឃាត់ខ្លួននៅអធិការដ្ឋាននគរបាល ក្រុងព្រះសីហនុ ដើម្បីកសាងសំណុំរឿងបញ្ជូនទៅសាលាដំបូងខេត្តព្រះសីហនុចាត់ការបន្ត ៕(ដោយ សំណាង៩៦)
