ភ្នំពេញ៖ ក្មេងទំនើង២ក្រុមបានឌឺដងដាក់គ្នា រហូតបង្កជាហិង្សាវាយតប់គ្នា និងបន្តយកកាំបិតកាប់គ្នាឱ្យរងរបួស ផ្អើលដល់សមត្ថកិច្ចចុះអន្តរាគមន៍ឃាត់បាន៥នាក់ នៅវេលាម៉ោង១០:៣០នាទីយប់ថ្ងៃទី២១ខែមករាឆ្នាំ២០២៥ ស្ថិតនៅចំណុចភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ ។

ប្រភពពីកន្លែងកើតហេតុបានឱ្យដឹងថា ដំបូងក្រុមក្មេងទំនើង ខាងលើបានឌឺដងដាក់គ្នាម្ដងរួចមកហើយតែមិនបានធ្វើអ្វីដាក់គ្នានោះទេ ។ លុះបន្ទាប់មកស្រាប់តែភាគីម្ខាង បានដើរកាត់មុខភាគីម្ខាងទៀត ក៏ត្រូវបានខាងភាគីម្ខាងទៀតនាំគ្នាព្រួតវានឹងយកកាំបិតប៉័ងតោទៅកាប់បណ្តាលឱ្យរងរបួស។

ប្រភពបានបន្តថា ហេតុការណ៍ប្រយុទ្ធគ្នានេះ បានផ្អើលដល់ប្រជាពលរដ្ឋ ក៏បានទាក់ទងប្ដឹងទៅសមត្ថកិច្ចមូលដ្ឋានចុះមកអន្តរាគមន៍ភ្លាមៗដោយឃាត់ក្មេងទំនើងបានចំនួន៥នាក់ ដឹកតាមម៉ូតូរ៉ឺម៉កយកទៅប៉ុស្តិ៍ដើម្បីសួរនាំ ។

បច្ចុប្បន្នក្រុមក្មេងទំនើង៥នាក់ខាងលើត្រូវបាន នគរបាលប៉ុស្តិ៍ចោមចៅទី៣ កសាងសំណុំរឿងបញ្ជូនខ្លួនទៅកាន់ផ្នែកជំនាញនគរបាលខណ្ឌពោធិ៍សែនជ័យដើម្បីចាត់ការបន្តតាមនីតិវិធីច្បាប់៕(ដោយ គា សំណាង)
