ស.រ.អា ៖ ប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានបដិសេធកាលពីថ្ងៃអង្គារ ទី៧ មករាក្នុងការទាត់ចោលការប្រើប្រាស់យោធា ឬសកម្មភាពសេដ្ឋកិច្ច ដើម្បីបន្តការទិញយកព្រែកជីកប៉ាណាម៉ា និង កោះហ្គ្រីនលែន (Greenland) ដែលជាផ្នែកនៃរបៀបវារៈវាទទីនិយម ដែលលោកបានផ្សព្វផ្សាយចាប់តាំងពីឈ្នះការបោះឆ្នោតថ្ងៃទី ៥ ខែវិច្ឆិកាឆ្នាំ២០២៤។
លោកត្រាំ ដែលបានលើកឡើងអំពីគំនិតនៃការប្រែក្លាយកាណាដាទៅជារដ្ឋរបស់សហរដ្ឋអាមេរិកដែរនោះ បាននិយាយថា លោកនឹងទាមទារការចំណាយលើវិស័យការពារជាតិខ្ពស់ជាងមុនពីសម្ព័ន្ធមិត្តណាតូ និងបានសន្យាថានឹងប្តូរឈ្មោះឈូងសមុទ្រម៉ិកស៊ិក ទៅជាឈូងសមុទ្រអាមេរិកវិញ។
នៅសល់ពីរសប្តាហ៍ទៀតនឹងចូលកាន់តំណែង លោកត្រាំបានចាប់ផ្តើមគូសបញ្ជាក់ពីគោលនយោបាយការបរទេសដ៏គឃ្លើន ដោយគិតគូរតិចតួចបំផុតចំពោះការពិចារណាផ្នែកការទូត ឬក្តីកង្វល់របស់សម្ព័ន្ធមិត្តអាមេរិក។
នៅពេលសួរនៅក្នុងសន្និសីទសារព័ត៌មាននៅឯរមណីយដ្ឋានផ្លរីដារបស់គាត់ថាតើគាត់អាចធានាពិភពលោកបានទេថា គាត់នឹងមិនប្រើការបង្ខិតបង្ខំផ្នែកយោធា ឬសេដ្ឋកិច្ច នៅពេលដែលគាត់ព្យាយាមគ្រប់គ្រងព្រែកជីកប៉ាណាម៉ា និងកោះហ្គ្រីនលែន លោកត្រាំបាននិយាយថា «ទេ ខ្ញុំមិនអាចធានាអ្នកបានទេ ប៉ុន្តែខ្ញុំអាចនិយាយបានថា យើងត្រូវការវាសម្រាប់សន្តិសុខសេដ្ឋកិច្ច»។
លោកត្រាំ បានរិះគន់ការចំណាយរបស់អាមេរិកលើទំនិញកាណាដា និងការគាំទ្រផ្នែកយោធាសម្រាប់កាណាដាដោយនិយាយថា សហរដ្ឋអាមេរិកមិនបានទទួលអត្ថប្រយោជន៍ពីការធ្វើដូច្នេះទេ ហើយបានហៅព្រំដែនរវាងប្រទេសទាំងពីរថាជា «ខ្សែបន្ទាត់គូរដោយគ្មានរូបរាងពិត»។
លោកបានលើកឡើងថា លោកនឹងដាក់ពន្ធលើប្រទេសដាណឺម៉ាក ប្រសិនបើប្រទេសនេះជំទាស់នឹងសំណើរបស់លោកក្នុងការទិញយកកោះហ្គ្រីនលែន ដែលលោកនិយាយថាមានសារៈសំខាន់ចំពោះសន្តិសុខជាតិរបស់សហរដ្ឋអាមេរិក។ មិនយូរប៉ុន្មានមុនពេលការអត្ថាធិប្បាយរបស់លោកត្រាំ កូនប្រុសរបស់គាត់ឈ្មោះ Don Jr បានមកដល់កោះហ្គ្រីនលែន សម្រាប់ដំណើរទស្សនកិច្ចឯកជនមួយ។
ដាណឺម៉ាកបាននិយាយថា ហ្គ្រីនលែន ដែលជាផ្នែកគ្រប់គ្រងដោយខ្លួនឯងនៃព្រះរាជាណាចក្ររបស់ខ្លួន គឺមិនមែនសម្រាប់លក់ទេ។
នាយករដ្ឋមន្ត្រីដាណឺម៉ាក លោក Mette Frederiksen បាននិយាយកាលពីល្ងាចថ្ងៃអង្គារថា «ខ្ញុំមិនគិតថា វាជាមធ្យោបាយដ៏ល្អឆ្ពោះទៅរកការប្រយុទ្ធគ្នាជាមួយនឹងមធ្យោបាយហិរញ្ញវត្ថុនោះទេ នៅពេលដែលយើងជាសម្ព័ន្ធមិត្តនិងដៃគូជិតស្និទ្ធ»៕(ប្រែសម្រួលដោយ លោកសំណាង)
