កូរ៉េខាងត្បូង ៖ ក្រុមអ្នកស៊ើបអង្កេតកូរ៉េខាងត្បូងបាននិយាយកាលពីថ្ងៃទី ១ ខែមករាឆ្នាំ២០២៥ថា ពួកគេនឹងអនុវត្តដីកាចាប់ខ្លួនប្រធានាធិបតី Yoon Suk Yeol ជុំវិញការប្រកាសច្បាប់អាជ្ញាសឹករបស់គាត់គិតត្រឹមថ្ងៃផុតកំណត់ ទី ៦ខែមករា ខណៈដែលមេដឹកនាំដែលគេព្យួរពីតំណែងរូបនេះ ប្តេជ្ញាថានឹងតស៊ូរហូតដល់ទីបញ្ចប់។
អ្នកគាំទ្រ និងគូប្រជែងរបស់លោក Yoon ដែលសភាព្យួរតំណែងជុំវិញការប៉ុនប៉ងរបស់គាត់ក្នុងការផ្តួលរំលំការគ្រប់គ្រងបែបស៊ីវិលក្នុងខែធ្នូ បានបោះជំរំស្នាក់នៅខាងក្រៅវិមានប្រធានាធិបតី ជាទីដែលគាត់បានស្នាក់នៅអស់ជាច្រើនសប្តាហ៍មកហើយ ដើម្បីទប់ស្កាត់កិច្ចខិតខំប្រឹងប្រែងរបស់អ្នកស៊ើបអង្កេតក្នុងការសាកសួររូបគាត់។
ការិយាល័យស៊ើបអង្កេតអំពើពុករលួយ (CIO) បានស្នើសុំដីកាចាប់ខ្លួន បន្ទាប់ពីលោក Yoon ខកខានក្នុងការរាយការណ៍សម្រាប់ការសាកសួរជាលើកទីបី។ ប៉ុន្តែគេមិនច្បាស់ទេថាតើដីកានេះនឹងអាចចាប់ប្រធានាធិបតីបានឬយ៉ាងណា ព្រោះថាសេវាសន្តិសុខប្រធានាធិបតីធ្លាប់បានបដិសេធមិនអនុវត្តតាមដីកាឆែកឆេររួចមកហើយ។
លោក Yoon នៅតែរឹងរូស ហើយកាលពីល្ងាចថ្ងៃទី ១ ខែមករា ហាក់បានលើកឡើងថា លោកនឹងបដិសេធមិនប្រគល់ខ្លួនឲ្យអ្នកស៊ើបអង្កេតទេ នៅក្នុងសេចក្តីថ្លែងការណ៍មួយ ដែលបានចែករំលែកជាមួយអ្នកគាំទ្រដែលបានបោះជំរំនៅខាងក្រៅលំនៅឋានរបស់គាត់ក្នុងទីក្រុងសេអ៊ូល។
មេធាវីរបស់លោក គឺលោក Yoon Kab-keun បានបញ្ជាក់ប្រាប់ទីភ្នាក់ងារសារព័ត៌មាន AFP ថា «បច្ចុប្បន្នសាធារណរដ្ឋកូរ៉េកំពុងស្ថិតក្នុងគ្រោះថ្នាក់ ដោយសារកម្លាំងខាងក្នុង និងខាងក្រៅគំរាមកំហែងដល់អធិបតេយ្យភាពរបស់ខ្លួន និងសកម្មភាពនៃធាតុប្រឆាំងនឹងរដ្ឋ»។
លោកបានបន្ថែមថា «ខ្ញុំប្តេជ្ញាតស៊ូជាមួយអ្នកឲ្យដល់ទីបំផុតដើម្បីការពារប្រទេសជាតិមួយនេះ», ដោយនិយាយថា «គាត់កំពុងមើលការតវ៉ាពីមនុស្សរាប់រយពាន់នាក់នៅលើការផ្សាយបន្តផ្ទាល់តាម YouTube »។
លោក Jo Seoung-lae សមាជិកសភានៃគណបក្សប្រជាធិបតេយ្យ ដែលជាបក្សប្រឆាំង បាននិយាយនៅក្នុងសេចក្តីថ្លែងការណ៍មួយថា សាររបស់លោក Yoon គឺ «មិនសមរម្យទេ» ដោយហៅគាត់ថា «វង្វេងស្មារតី»និងចោទប្រកាន់គាត់ថាបានព្យាយាមញុះញង់ឱ្យមានការប៉ះទង្គិចគ្នា។
ប្រធាន CIO លោក Oh Dong-woon បាននិយាយនៅថ្ងៃទី ១ ខែមករាថា ដីកាចាប់ខ្លួននឹងត្រូវអនុវត្តតាមកាលកំណត់ ថ្ងៃទី ៦ ខែមករាឆ្នាំ២០២៥ខាងមុខ។
លោកបានប្រាប់អ្នកយកព័ត៌មានថា «យើងមានបំណងឱ្យដំណើរការចាប់ខ្លួនមានភាពរលូនដោយគ្មានការរំខានធំដុំប៉ុន្តែយើងក៏កំពុងសម្របសម្រួលដើម្បីប្រមូលផ្តុំប៉ូលិស និងទាហានឲ្យត្រៀមខ្លួនផងដែរ»។
លោកក៏បានព្រមានដែរថា អ្នកណាដែលព្យាយាមរារាំងអាជ្ញាធរមិនឲ្យចាប់ខ្លួនលោក Yoon អាចប្រឈមនឹងការកាត់ទោស។
ក្រុមអ្នកច្បាប់របស់លោក Yoon បានដាក់ពាក្យបណ្តឹងដើម្បីរារាំងដីកានេះ ហើយបានអះអាងនៅថ្ងៃទី ១ ខែមករាថាដីកាចាប់ខ្លួនគឺជា «ទង្វើខុសច្បាប់ និងមិនត្រឹមត្រូវ»។
អ្នកគាំទ្រផ្កាប់មុខរបស់ប្រធានាធិបតីបាននាំគ្នាសម្រុកមកទីក្រុងសេអ៊ូលដើម្បីគាំទ្រគាត់។
នៅខាងក្រៅបរិវេណប្រធានាធិបតី មនុស្សរាប់សិបនាក់ ខ្លះស្លៀកសំលៀកបំពាក់តុបតែង អាចមើលឃើញកំពុងស្រែក ច្រៀង និងដៀលត្មិះប៉ូលិស។
ខណៈស្បៃរាត្រីបានគ្របដណ្តប់ ក្រុមបាតុករគាំទ្រលោក Yoon បានគ្រវីដំបងភ្លើងពណ៌ និងបដាប្រឆាំងការចោទប្រកាន់ព្យួរតំណែងប្រធានាធិបតី។
មន្ត្រីកូរ៉េខាងត្បូងពីមុនមកបានបរាជ័យក្នុងការអនុវត្តដីកាចាប់ខ្លួនសមាជិកសភា ក្នុងឆ្នាំ ២០០០ និង ២០០៤ដោយសារតែសមាជិកបក្ស និងអ្នកគាំទ្ររារាំងប៉ូលិសមិនឱ្យចូលក្នុងរយៈពេលប្រាំពីរថ្ងៃ ដែលដីកាចាប់ខ្លួនមានសុពលភាព៕(ប្រែសម្រួលដោយ លោកសំណាង)
